Compromiso pídelle ao goberno de Ponteareas que non só predique coa transparencia se non que a aplique

Compromiso por Galicia denuncia a falta de transparencia e de democracia por parte do goberno municipal de Ponteareas, BNG, PSOE e Riada do Tea(Podemos), ante a negativa de facilitarlle aos cidadáns documentación pública.

Os galeguistas estiveron hoxe no concello intentando ver as actas das Xuntas de Goberno, documentos que teñen que estar a disposición dos veciños e veciñas porque son públicos. O goberno negou dito acceso mentres non se fixera a solicitude por escrito e o alcalde o autorizase.

E incríbel que uns partidos que abandeiraban a transparencia e a participación cidadá lle neguen aos veciños e veciñas un dereito, sinala Sandra Araúxo.

Compromiso solicítalle ao goberno municipal que publique na web as actas dos plenos, xuntas de goberno, os decretos de alcaldía, as contas municipais (ingresos e gastos), os ingresos que percibe cada concelleiro e partido político, as ofertas de emprego e os cursos de formación

Do mesmo xeito solicitan que se faga público o acordo de goberno. Fai practicamente un mes dende a investidura e aínda se descoñece. O pobo só sabe que pactaron as subidas nas adicacións exclusivas dos concelleiros/as , asistencias a plenos e xuntas de goberno, ou a asignación por partido político.

Os galeguistas traballarán para que o novo goberno cumpra as súas promesas e faga deste concello unha administración transparente, coas paredes de cristal, onde os cidadáns podan acceder á información sen obstáculos e en igualdade de condicións.

Compromiso consegue paralizar a consolidación

Compromiso quere lembrar que leva denunciando dende fai máis dun ano , na defensa do interese xeral e da transparencia nas diferentes administracións públicas a oferta de emprego público do concello de Ponteareas por estar caducada e non respectar a igualdade de oportunidades. De feito, dende xullo de 2014 presentou diferentes escritos diante do Ministerio de Administracións Públicas, Consellería de Presidencia, Valedor do Pobo , o concello e, finalmente, diante da Fiscalía Xeral de Vigo.

Compromiso defende que a oferta de emprego pública foi publicada no ano 2008, polo que ten cumprido o tempo máximo de tres anos para a súa execución.

Os galeguistas foron os primeiros e único partido que denunciou estes feitos  a pesares de que agora outros preténdense levar os galóns, cando non fixeron nada cando estaban na oposición para impedir que esta consolidación se levase a cabo. 

Compromiso alédase da paralización da consolidación, e agora seguirá a velar pola legalidade, a igualdade de oportunidades e a total transparencia nos procesos de oferta de emprego público.

Quere lembrarlle ao goberno actual que as bases teñen que ser xustas, que se convoquen todas sen excepcións e que non se pode computar a experienza  as persoas que están na sentenza dos enchufados, xa que estes son contratos nulos.

Compromiso consegue que Industria sancione a Gas Natural con 9.500€

Compromiso por Galicia leva denunciado dende 2013 a estafa nas instalacións de Gas Natural en Ponteareas. 

A multinacional Gas Natural ofrece un servizo aos cidadáns carecendo dos permisos e autorizacións que marca a lei o que pon en perigo a  seguridade, saúde e habitabilidade dos propietarios das vivendas, incluso perxudicando o medioambiente.

Dende finais de 2013  levamos advertindo desta situación, tanto no concello, con reunións có ex-alcalde, Salvador González Solla, como na Consellería de Industria. Incluso participamos nunha xuntanza con Gas Natural, informan os galeguistas.

O pasado 18 de maio de 2015 a Consellería de Industria sanciona a Gas Natural con 9.500€ por carecer dos boletíns de industria e suministrar gas nas vivendas de FOVISA. Todo grazas as denuncias e a presión de afectados e afectadas e de Compromiso.

Os galeguistas e afectados/as se reunirán mañá xoves ás 13.30h có novo alcalde de Ponteareas (do BNG), para que resolva o expediente de obra que hai no concello sobre este mesmo tema e repoña a legalidade no edificio FOVISA.

Compromiso esixe ao novo goberno que ampare aos afectados pola estafa do Gas Natural, que se poñan do lado dos cidadáns e que non se agochen como fixeron ata o de agora na oposición, xa que nunca se pronunciaron sobre este tema cando eran coñecedores do tema.

Compromiso por Galicia considera innecesaria a contratación dun Técnico Superior en Administración

Contratar un técnico superior e pedir experiencia de adminsitrativo ou auxiliar administrativo xenera sospeitas de “pucherazo ou contratación dixital”

Compromiso por Galicia, por medio da súa portavoz Sandra Araúxo, ante a fanfarria do gobernó local á hora de facer pública a contratación dun  Técnico Superior en Administración para a xestión dun curso no Centro de Desenvolvemento Local quere sinalar que é “totalmente innecesario para as tarefas que se lle teñen encomendadas na O.P.E.”. Os galeguistas entenden que un C.D.L. que conta cun Director con máis de vinte anos de experiencia xestionando cursos de formación continua, un administrativo e dous axentes de desenvolvemento local son suficientes para facer as labores administrativas do curso que se limitan á burocracia administrativa (S20, altas, baixas, partes de asistencia e control das facturas relacionadas co curso…).

Outra cousa sería a contratación mediante una O.P.E. de un Técnico Superior en administración Local para o reforzó das áreas de Secretaría, Tesoureiría ou Intervención onde non existen funcionarios de grupos superiores independentes e profesionais, e administrativos e auxiliares vense obrigados a facer traballos de superior categoría sin percibir ningún tipo de retribución a maiores, sinalan os galeguistas.

Amáis, resulta cando menos sorprendente que se convoque una praza de Técnico Superior e que a experiencia que se require aos aspirantes sexa a de administrativo ou auxiliar administrativo, co que se demostra que as tarefas que realizará o traballador son as de papeleo administrativo e non as propias dun técnico superior.

Dende Compromiso por Galicia queremos advertir ao goberno local que a convocatoria desta praza e con esa experiencia esixida é susceptible de que sexa denunciada polo administrativo despedido o 8 de abril de 2014, cando cos votos favorables de PP, ACiP e o apoio tácito do PSdG, cuxa portavoz era Dona María Jesús Garrote, hoxe perimeira tenente de alcalde, acordaron a supresión dunha praza de administrativo. Esta convocatoria  dunha praza na que se esixe a mesma experiencia laboral que consideraron prescindible hai pouco máis dun ano supón una fraude de lei que os galeguistas porán en coñecemento do traballador e dos seus abogados para que actúen en consecuencia, sinalou Sandra Araúxo.

O desemprego en Ponteareas e a política de posado de María Soledad Valado

Alá polo mes de xullo do ano 2011, cando comezou a última lexislatura local en Ponteareas danse dous feitos importantes que marcarán a lexislatura: o nomeamento de María Soledad Valado como concelleira de Emprego en Ponteareas e o Servizo Público de Emprego sinala que en Ponteareas, xa pasto da crudeza da crise económica, tiña 2.621 desempregados. Algo decía que a cousa non podía ir cara a peor, dado que a lexislatura 2007/2011 comezou cun total de desempregados na vila de 1.364 veciños, e que unha nefasta xestión de González Solla fora quen de duplicala en so catro anos. 

Ata ese momento a culpa era de ZP e dun goberno socialista incapaz de ver a crise, e de recoñecer a súa propia existencia. O ano 2011 segundo o Partido Popular sería o da "xente normal" cun goberno formado polos mellores.

E dentro dos mellores, a nivel local, venderon a Belén Villar, responsable da parcela económica, e a María Soledad Valado, responsable da parcela de emprego e promoción económica municipal, incluído o Centro de Desenvolvemento Local.

Catro anos despois, miles de fotografías na prensa, centos de notas de prensa que falaban dos seus logros e andainas entre mercados, crear unha asociación de comerciantes afín, usar a oficiña de consumo como oficiña de propagandaconsumidores, cursos de formación repetitivos e sin aportar saídas profesionais aos veciños, centos de miles de euros en inversión por parte da Deputación e da Xunta de Galicia e si, ao final conseguíu incrementar o número de desempregados, cousa que semellaba imposible. 

En maio de 2015, mes no que os veciños califican ao goberno, Ponteareas ten 2.794 desempregados, un 5% máis que cando Valado foi nomeada Concelleira. E iso que Ponteareas pasa de ter casi 25.000 habitantes a pouco máis de 23.000. Diminuíndo a poboación activa polo "espíritu viaxeiro" e "interese en coñecer mundo" da xente, o desemprego increméntase nun alarmante 5%. E iso que a lexislatura non rematou cinco meses antes, porque o desemprego a finais de 2014 superaba os 3.050 desempregados.

Pero ao marxe da frialdade do dato compre sinalar que no último informe do SEPE pon negro sobre branco o tipo de contrato ao que se ven abocados os veciños da vila. Dos 325 contratos asinados 289 foron temporais e so 15 contratos deveniron en indefinidos.

E para non ser menos, Valado nos deixa cunha traca final. Ten a desvergoña de anunciar que Ponteareas contará gracias á súa xestión cun segundo Orientador Laboral en Ponteareas. Seguramente de ter feito unha xestión axeitada incluso Ponteareas non precisaría nin o primeiro. O feito de que a Xunta conceda un segundo orientador pode ser por dous motivos: ou hai moito desempregado ao que orientar ou queren enchufar a algún coñecido para venda de favores.

Agora, incluso algún concelleiro popular chora polas esquiñas decindo que ten que buscar traballo. Pois nada, iso non é o máis duro, o peor é que incluso terán que pagar do seu peto o teléfono móbil, que levan usando con cargo ao concello dende tempo inmemorial. Que visiten a González Solla na oficiña o INEM na que Feijóo regaloulle un posto de traballo e que lle pidan recomendacións.A ver si fora da alcaldía é quen de "colocar" a tanta xente como fixo con cargo a Plans de Acción Municipal e similares.

Compromiso apoia as demandas dos traballadores de FCC

Compromiso por Galicia en Ponteareas quere manifestar o seu apoio á folga convocada polos traballadores e traballadoras de FCC ao entender que as súas revindicacións axústanse a dereito nas súas peticións.

Unha vez máis os traballadores mobilízanse ante o que é o resultado das políticas neoliberais do PSOE e PP en materia dos dereitos laborais. As reformas laborais aprobadas na UE e aplicadas nos sucesivos gobernos do PSOE e PP deixan  en evidencia as políticas de corte neoliberal que serviron para empobrecer aos traballadores e traballadoras, neste caso os traballadores de FCC mediante un goberno do PP e ACiP cando no ano 2006 outorgaron unha concesión de 16 anos á empresa FCC.

Compromiso por Galicia de Ponteareas quere lembrarlle ao Alcalde que mentres el cobrou un salario de preto 50.000 euros anuais, el e o seu partido fixeron posible que en Ponteareas se puxesen de moda salarios míseros de menos de 700 euros, con xornadas laborais de luns a domingo, Esta é a verdadeira cara da política laboral e social do Partido Popular e de Salvador González Solla.

Para os galeguistas a solución pasa por rescatar e remunicipalizar os servizos públicos e asumir os traballadores e traballadoras como propios do concello enmarcados nun novo convenio colectivo no que ningún traballador perciba unha remuneración inferior aos 1200€/mes, proposta que presentamos no noso programa municipal.

Compromiso tamén quere que os cidadáns fagan memoria, así como, que os traballadores/as e vexan quen foi o responsable de meterlle nas mans o servizo de limpeza a FCC en Ponteareas, que foi entre outros o BNG cando apoiou esta concesión millonarias..

Agora toca esperar si o PP é quen de asumir as peticións dos traballadores en folga ou si lle pasa a pelota o tellado do novo goberno, BNG+PSOE.... que recolle os “seus propios logros de agasallar á empresa das irmáns Koplovitz un servizo tan básico como era o da recollida do lixo e a limpeza viaria. Tamén toca ver o papel de EUSon e Riada do Tea e si cumpren coas propostas que imprimiron nos seus papeis, ou simplemente eran un brindes ao sol.

A todo isto, compre lembrar que hai dous anos a concelleira de facenda saíu nos medios sinalando a apertura dun expediente a FCC, baseado nos informes dun técnico municipal, e avalado por unha auditoría externa, dicindo que FCC incumpría o contrato, deixando de prestar servizos por un importe estima do de 400.000 euros anuais, o que supón que nos nove anos que leva de contrato leva “sisando” aos veciños e veciñas a píngüe cantidade de 3,3 millóns de euros.

Compromiso quere aproveitar para denunciar que os servizos mínimos son abusivos, e apoiará as mobilizacións dende o sitio que lle corresponda, pedindo publicamente aos cidadáns apoio e comprensión , lembrándolles que serán so uns días a resistencia do último resquizo do goberno do PP, xa que dan por feito que o novo goberno resolverá esta situación.

Compromiso por Galicia de Ponteareas quere tamén lembrarlle á empresa FCC que o dereito á folga está recollido nos E.T e na propia Constitución Española e invita tamén ao Alcalde a buscar unha saída negociada onde os traballadores poidan recuperar os dereitos laborais, non so os salariais, se non  tamén sociais.

O membros de Compromiso serán un piquete informativo a favor das revindicacións laborais, na procura dunha pronta solución.

Vimos para quedarnos

5494 ponteareáns decidiron outorgar ás forzas progresistas unha mayoría suficiente para afrontar unha lexislatura estable e de cambio no Concello. Dende Compromiso por Galicia/Concellos Transparentes de Ponteareas, queremos publicamente felicitar aos grupos que acadaron representación, especialmente ao grupo de forzas progresistas que terán que tomar as riendas do Concello, BNG/AA, PSdG-PSOE, RdT e EUSon.

Agradecer os 292 votantes da nosa Candidatura e transmitir publicamente que a pesar de non acadar representación no Concello vimos para quedarnos. 

Estas eleccións, as primeiras municipais ás que nos presentamos, serviron non so para dar a coñecer a Compromiso por Galicia, senón que moitos vecinos e veciñas se achegaron a nos e agora temos unha base social de simpatizantes máis sólida e forte. En datas vindeiras reorganizarémonos e seguiremos a facer a mesma laboura de oposición e de control que si tivésemos representación. VIMOS PARA QUEDARNOS.

Nun análise máis polo miudo, como nota negativa, decir que se producíu unha baixa na participación, xa que o 63% de voto contabilizado estivo cinco puntos por debaixo dos datos de 2011, o que demostra a desafección política xa que coa que está a caer non se producíu un incremento da participación. Para Compromiso iso é preocupante, así comoo incremento ata o 2,71% de votos nulos e o 1,88% de brancos. 

Seguimos a votar de menos un debate público, a pesar de que convocamos a todos os grupos políticos na Praza Maior o día 22 de maio, debate ao que so se presentou o candidato de EUSon, feito que queremos agradecer.

Estamos contentos pola campaña realizada e estamos en disposición de continuar o traballo que comezamos no ano 2013 por Ponteareas desde o lugar que ocupamos a pesar de non acadar representación. E lanzamos as nosas primeiras propostas á nova corporación:

Que permitan a participación e presenza pública nas reunións da Xunta de Goberno Local, para o que terían que facerse fora de horario laboral para a cidadanía.

Que se preparen para o curso 2015-16 comedores públicos con cociñas propias nos centros de ensino de Ponteareas, rexeitando a figura do cattering.

Incremento das axudas sociais aos desfavorecidos e perxudicados pola crise económica.

Cumprimento da legalidade en materia de persoal no Concello de Ponteareas, rematando coa revisión de nulidade iniciada no Concello no ano 2009, impedido a presenza de traballadores sen cualificación profesional e reubicando aos traballadores nas prazas para os que foron contratados.

Un saúdo, un compromiso.