Compromiso consegue que Industria sancione a Gas Natural con 9.500€

Compromiso por Galicia leva denunciado dende 2013 a estafa nas instalacións de Gas Natural en Ponteareas. 

A multinacional Gas Natural ofrece un servizo aos cidadáns carecendo dos permisos e autorizacións que marca a lei o que pon en perigo a  seguridade, saúde e habitabilidade dos propietarios das vivendas, incluso perxudicando o medioambiente.

Dende finais de 2013  levamos advertindo desta situación, tanto no concello, con reunións có ex-alcalde, Salvador González Solla, como na Consellería de Industria. Incluso participamos nunha xuntanza con Gas Natural, informan os galeguistas.

O pasado 18 de maio de 2015 a Consellería de Industria sanciona a Gas Natural con 9.500€ por carecer dos boletíns de industria e suministrar gas nas vivendas de FOVISA. Todo grazas as denuncias e a presión de afectados e afectadas e de Compromiso.

Os galeguistas e afectados/as se reunirán mañá xoves ás 13.30h có novo alcalde de Ponteareas (do BNG), para que resolva o expediente de obra que hai no concello sobre este mesmo tema e repoña a legalidade no edificio FOVISA.

Compromiso esixe ao novo goberno que ampare aos afectados pola estafa do Gas Natural, que se poñan do lado dos cidadáns e que non se agochen como fixeron ata o de agora na oposición, xa que nunca se pronunciaron sobre este tema cando eran coñecedores do tema.

Araúxo alerta do perigo de derrube na estada do Cabalón

As intensas chuvias do mes de outubro produciu pola filtración da auga un derrubo na estrada que leva o Cabalón na parroquia de Angoares.

O goberno do Partido Popular coñece esta situación dende fai catro meses e non arranxou a estrada, o único que fixo foi poñer unha cinta para advertir do perigo.

Compromiso está preocupado que poda acontecer un accidente no lugar, porque a vía é transitada por moita xente que vai visitar o Cabalón, por maquinaria pesada dos  veciños/as que traballan fincas do lugar e por cidadáns que circulan e pasean a diario por ese lugar.

Sandra Araúxo, candidata de Compromiso, solicita que se arranxe esta estrada antes de que aconteza algunha desgraza, e a estrada se siga derrubando.

Se volven as chuvias o firme seguirá índose e a fochanca aumentando o seu tamaño, advirte Araúxo.

Compromiso di que xa é hora de que Belén Villar asuma a súa incompetencia en materia de persoal e facenda

Os galeguistas, unha vez máis, tachan a Belén Villar, concelleira de Facenda de incompetente, porque non foi quén de aprobar unha RPT, nin uns orzamentos en todo o mandato.

O goberno do Partido Popular non presentou ao Pleno un orzamento en todo o mandato, a pesar de contar co apoio tácito e a sumisión (dende a denuncia por presunta conexión irregular do concelleiro González Carrera á rede pública de electricidade) durante toda a lexislatura de ACIP, coa única finalidade de ter partidas infladas e poder incrementar o gasto, incumprindo os plans de axuste aprobados nos últimos anos.

Por mor da profunda crise económica que padece o Estado derivada das políticas de recortes de PSdG, incrementados de maneira brutal dende o acceso do PP ao goberno, o concello de Ponteareas ingresa moito menos que hai catro anos, cando se aprobou o último orzamento, aseguran os galeguista.

Esta redución de ingresos tería que compensarse co axuste nos gastos eliminando partidas superfluas e innecesarias e incrementando, na medida do posible, partidas tendentes a axudar aos que están a padecer de maneira máis violenta os efectos da crise: desemprego, fame, desnutrición, etc.

“O Concello mantén aos funcionarios de Ponteareas cos salarios máis baixos de España para manter a súa rede clientelar e consolidar aos enchufados de Pepe Castro", manifestan os galeguistas. Non podería ser doutra maneira dado que o PP sempre entendeu a xestión municipal como un xeito de colocar e pagar prebendas.

Villar, só se preocupou de intentar consolidar a determinados traballadores, e non de elaborar unha RPT, legal e xusta, como marca a lei. Consolidación que ten denunciado Compromiso en varias instancias, o que fixo posible que o PP non acadara de momento o seu obxectivo, que é consolidar aos enchufados.. Curiosamente un dos enchufados é o responsable da política salarial do Concello dado que  é o técnico laboral municipal.

Compromiso solicita medidas disciplinares para os directivos Conservatorio

Os galeguistas manifestan que o goberno deu a calada por resposta ante a denuncia de Compromiso sobre os presuntos cobros irregulares.

O Conservatorio Municipal leva organizando durante anos cursos extraescolares, impartidos por prestixiosos músicos do panorama Estatal. Antes de que  Belén Villar collera as responsabilidades das áreas de  Facenda e Persoal, a matricula de inscrición os mesmos se ingresaba nunha conta municipal, tal e como mostran as bases que achegan os galeguistas e tal e como manifesta o fiscal na súa acta.

A partires do ano 2011, coa entrada no goberno de Solla, de Belén Villar, os diversos cursos organizados polo conservatorio comezaron a cobrarse aos alumnos presuntamente de maneira irregular. Os  ingresos da matrícula se fixeron nunha conta bancaria presuntamente allea o concello, probas que presentou Compromiso ante a fiscalía, e que agora o fiscal da como probadas.

CxG pediu un expediente disciplinar contra os directivos do Conservatorio, logo de que o fiscal certificase que quedan probadas ditas irregularidades, e o goberno da a calada por resposta, encubrindo ditos feitos.

“Novamente, nos atopamos cun presunto cobro irregular no concello de Ponteareas, e novamente o presunto responsable do cobro, ten relación có Partido Popular, dado que,  o director do centro neses intres, era candidato na listas das municipais do PP de Gondomar”, aseguran os galeguistas.

A día de hoxe o concello non tomou ningún tipo de medida, para depurar responsabilidades, o que fai sospeitar, de que o goberno pretende agochar e encubrir os implicados, neste asunto tan grave, alerta CxG.

Ponteareas, 16 de decembro de 2014

O desemprego en Ponteareas sube en 139 persoas en dous meses

Redacción, 2 de decembro.  Compromiso por Galicia Ponteareas  vén de cualificar como “negativos” os datos de paro da nosa cidade feitos públicos hoxe. O que, segundo os galeguistas, “amosan destrución de emprego durante o mes de novembro”. “xa non só estamos a falar dunha subida de 139 persoas a respecto do mes anterior, senón que estamos vendo que non existe un cambio de tendencia como parece dicir Feijóo e o PP. Nin o goberno da Xunta, nin tampouco o goberno local do PP e Solla, fan algo para melloralo”. 

Compromiso entende que “logo dun ano da austeridade de Feijóo e de reformas laborais, estamos vendo como esta política só crea traballos temporais e precarios, e destrúe o resto”.  Os galeguistas creen que “se pon en evidencia a desastrosa xestión do goberno Feijóo diante do principal problema que teñen os galegos, e tamén para os Ponteareas”, xa que dende que Alberto Núñez Feijóo goberna uns 50.000 galegos e galegas pasaron a estar rexistrados nas listas do paro, e “os datos en Ponteareas non son moito máis alentadores”. 

Compromiso por Galicia aposta en Ponteareas por unhas políticas activas de emprego centradas “nas axudas ao pequeno comercio, que a día de hoxe está afogado e sen ningún tipo de axudas por parte do Concello e pola aprobación do PXOM, para dotar a vila de solo industrial”.

DATOS DESEMPREGO EN PONTEAREAS. NÚMEROS ABSOLUTOS

Setembro 2014; 2809

Outubro 2014: 2935

Novembro 2014: 2948

O PP pon en perigo aos cidadáns có seu desleixo no mantemento da N-120

O goberno municipal  e o Ministerio de Fomento do Partido Popular son uns irresponsables ao xogar coa seguridade dos veciños e veciñas

Compromiso alertaba no mes de abril ao concello e ao ministerio de Fomento sobre o perigo que se atopaba a “Rúa de Abaixo”, actual Rúa Real, na Nacional 120, coas farolas do alumeado público en mal estado. Daquela os galeguistas presentaran sendos escritos dirixidos ao goberno municipal e ao Ministerio de Fomento, encargado do mantemento da vía, solicitando o arranxo dos desperfectos da rúa , entre os que se atopaban as farolas.

Para os galeguistas, é incríbel o desleixo do Ministerio de Fomento, e da despreocupación da ministra Ana Pastor, sendo coñecedores do estado ruinoso no que se atopan as farolas, có cabreado eléctrico ao aire e solto, sen caixas de protección, todas rotas. Calquera día podería xurdir un problema de seguridade cidadá, por atoparse as avarías o alcance de pequenos e animais, tal e como que aconteceu nos pasados días en Santiago de Compostela, onde faleceu unha nena.

Pasados xa cinco meses desde que Compromiso solicitara ao Ministerio de Fomento e ao concello de Ponteareas que arranxaran estes problemas na N-120,  a día de hoxe, xa non é que non o reparasen, se non que están en peores condicións. O único que fixo o PP no seu día, foi mentir na prensa dicindo que todo quedaría arranxado para o Corpus. Dado que a festividade do Corpus Christi é de carácter anual ,o que se preguntan os galeguistas é “ a qué ano se refería Solla cando dixo que o problema quedaría solucionado polo Corpus”.

Despois do lamentable accidente que lle custou a vida a unha rapaza en Compostela,  agardemos que non suceda nada parecido en Ponteareas, porque desta "a escusa de que non se sabía nada, non poderá utilizarse para disimular a incompetencia, desleixo e desidia dun goberno inútil,  desentendido das necesidades dos veciños e veciñas", engaden os galeguistas.

Ponteareas  16 setembro de 2014