O Concello de Ponteareas segue cometendo
irregularidade tras irregularidade no contrato da concesión da xestión do
suministro e da depuración da auga en Ponteareas. Tal e como consta nun informe
de secretaría é de dubidosa legalidade a concesión da xestión da auga a
Aquagest, que data dos anos 90, xa que non consta ningún proceso de
concorrencia pública senón unha adxudicación dixital logo dunha negociación
entre o entón alcalde, José Castro, e o xerente de Aquagest. Logo houbo
ampliacións de contrato para a EDAR, finais no ano 1996 e no 2013 a xestión da
ETAP, tamén de maneira pouco clara, informa Compromiso.
Dun contrato sen concurso público, Aquagest conseguiu
en menos de vinte anos un megacontrato, máis ben, unha lotaría de negocio, que non
lle obriga a nada, porque todo o que factura son beneficios, posto que todo
gasto posible o factura ao concello que é quen paga.
Agora logo de que AQUAGEST, estea salpicado nos casos
de corrupción Pokemon e Patos, unha nova empresa comeza a facturar os veciños
dende o mes de decembro. Dita empresa aparece con distinto NIF, VIAQUA, polo
que se trata de dúas empresas distintas, sinalan os galeguistas.
A empresa Viaqua comunicou ao concello que absorbera á
empresa Aquagest, pero este escrito carece de valor se non o ratifica o pleno
municipal, órgano competente. “Agora entendemos as presas e o agochamento da
negociación da privatización da ETAP ”, sinalan os galeguistas.
Compromiso, pregúntase porque o goberno do PP, non
leva a pleno este asunto. Será porque teñen medo a que os informes sexan
negativos? Partindo dunha concesión a dedo agora agochan estes feitos para
evitar ter que rescatar dito contrato e xestionalo de xeito municipalizado?. Se
o servizo o volvera levar o concello seguro que os veciños sairían gañando
porque se abaratarían custes.
Os galeguistas instan ao pleno, o PP, PSOE, ACIP e
BNG, a que se pronuncien no pleno sobre este contrato.
Ponteareas, 21 de marzo de 2014