Onte vimos de sufrir en Ponteareas un atentado contra o noso medio natural.
Arderon nas parroquias de Ribadetea, Padróns e Xinzo máis de 500 hectáreas
de monte baixo e forestal e que tardará décadas en recuperarse.
É incrible que haxa persoas que gocen vendo como se queima o noso
patrimonio natural, e poñan en perigo as vidas das persoas, así como a sostinibilidade
do noso planeta.
As
condicións climatolóxicas adversas, de vento e tempo seco, xunto coa
descoordinación dos efectivos contra incendios, pola falta de persoal humano da
zona, e o descoñecemento do lugar, tal e como manifesta o presidente da
comunidade de montes de Ribadetea, fixeron que o lume campara as súas anchas e
avanzara sen control durante horas.
A isto
hai que engadir que o Concello de Ponteareas non dispón dun corpo especializado
de loita contra o lume, nin dende o punto de vista de loita directa contra o
lume, nin dende o punto de vista técnico; por moito que se fagan simulacros, se
gasten recursos ou se concedan subvencións o GRUMIR de Ponteareas. Dito corpo está
formado por catro chóferes de camións e tres conserxes, o cal, a pesar da boa
vontade e esforzo que estes traballadores lle poñen ao seu traballo diario non
é suficiente na loita contra o lume que require coñecementos especializados na
materia e unha preparación que, lamentablemente, non teñen estes traballadores.
A culpa non é deles, a culpa é de quen pon en perigo as súas vidas e a dos
veciños/as, mantendo un corpo en precario en vez de apostar por un corpo
profesionalizado con funcionarios especialistas na materia e ben preparados.
Durante o día de onte vivimos horas de angustia porque o lume estivo preto
das casas en San Pedro e en Mouro, así como en Cillarga ou Parada e Rocha. Esta
angustia é a consecuencia directa das políticas de austeridade e de
despedimentos levada a cabo polo concello de Ponteareas. Dende hai dous anos o
goberno municipal non fai cumprir a normativa en materia de prevención nas
parcelas lindantes aos núcleos de poboación, nin nas parcelas lindantes coas
vivendas illadas, que abundan no noso territorio, construídas en moitos casos
coa conivencia do gobernos do PP, sobre terreo rústico.
Se a ao desmantelamento da área de medio ambiente do Concello, engadimos os
recortes que en materia de persoal fixo a Xunta de Galicia na loita e na
prevención contra incendios forestais, atopámonos coa situación de extrema
gravidade que vivimos.
Compre lembrar que Salvador González, por parte de alcalde é o concelleiro
de medioambiente, o responsable de facer cumprir a lei en materia de
prevención, para que os núcleos estean protexidos para que non volvan a
acontecer momentos tan extremos como os de onte, e cando temos por diante a época estival , a de risco máis elevado en materia
de incendios.
*Carta de Sandra Araúxo, candidata de Compromiso por Galicia á alcaldía de Ponteareas
Ningún comentario:
Publicar un comentario